Uncategorized

Шымкентте Конго-Қырым қызбасымен ауырған адам тіркелді

Науқаспен қарым-қатынаста болған 15 адам медициналық бақылауға алынған. Санитар мамандар алдымен «Конго-Қырым геморрагиялық қызбасына ықтимал жағдай» деп кеше мәлімет таратқан болатын.

Айта кету керек, Шымкент қаласы Конго-Қырым геморрагиялық қызбасы ауруына қолайсыз аймақтар қатарына жатады.
Ал, «бұл дерт Шымкентте тіркеліпті, ауру адам шығыпты» деген ақпараттың мәнісін Шымкент қаласының санитариялық-эпидемиологиялық бақылау департаментінің мамандары түсіндірді. «Науқас Түркістан облысы, Бәйдібек ауданының 46 жастағы тұрғыны. 16 мамыр күні «Асқазан-ішектен қан кету. Ауыр дәрежелі деңгей» диагнозымен Облыстық клиникалық ауруханаға жедел жәрдем көлігімен жеткізілген. Осы күні науқас «КҚГҚ ықтимал жағдай» диагнозымен Шымкент қаласының жұқпалы аурулар ауруханасына ауыстырылған. Бүгінгі күнге науқастың жалпы жағдайы интоксикация мен геморрагиялық синдромға байланысты ауыр дәрежеде. Науқас оқшауланып, қалалық жұқпалы аурулар ауруханасының жансақтау бөлімшесінде «КҚГҚ расталған жағдайы, ауыр дәрежелі деңгейде» диагнозымен ем алуда.  
Науқаспен қарым-қатынаста болған 15 адам анықталды, оның ішінде 9 адам — медициналық қызметкер, барлығы медициналық бақылауға алынды. Індеттің алдын алу мақсатында кешенді эпидемиологиялық, зоопаразитологиялық және ветеринарлық алдын алу іс шаралары тиісті мамандармен жалғасуда»

Орайы келгенде айта кету керек, Шымкентте бүгінге дейін кене шағып медициналық көмекке қаралған 284 адам тіркелген. Бұл былтырғы жылдың осы кезеңімен салыстырғанда көп. 2021 жылы – 94 адам тіркелген екен. Үш есеге өсіп отыр.
Бұл Шымкент қаласында кене көбейіп, олардың адамды шағу жағдайлары жиіледі деген сөз. Кенеге қарсы залалсыздандыру шараларын күшейту қажет. Көгалға демалыс ұйымдастырып, демалыс күндері саябақ, қала сыртындағы демалыс аймақтарына баратындар көп.
КҚГҚ ауруының алдын алу мақсатында Шымкент қаласының санитариялық-эпидемиологиялық бақылау департаментінің және оның аумақтық басқармаларының мамандары тұрақты түрде санитариялық-ағартау және түсіндіру жұмыстары жүргізуде.
Мамандар «Конго-Қырым геморрагиялық қызбасы (КҚГҚ) – бұл вирус қоздырғышынан туындайтын аса қауіпті жұқпалы ауру, науқас дер кезінде медициналық көмекке жүгінбеген жағдайда, өлім жағдайына әкеліп соқтыруы мүмкін» дейді.
Конго-Қырым геморрагиялық қызбасы ауруының негізгі клиникалық көріністері: инкубациялық кезең (ауру қоздырғышын жұқтырғаннан аурудың алғашқы белгілерінің пайда болуына дейінгі мерзім) 1-14 күнге дейін созылады, бұл кезеңнің ұзақтығы вирусты жұқтыру жолына байланысты болады.
Аурудың алғашқы белгілері: дене қызуының кенеттен 39-40ᵒС-қа дейін көтерілуі; қатты бас ауыруы; көздің қызаруы; бет, мойын және дененің жоғарғы бөлігінің қызарып, ісінуімен және мойын, арқа, белдің ауыруымен; лоқсу немесе құсу; іш ауыруы немесе өтуі; ауру одан әрі дамыған жағдайда: денеде бөртпелердің пайда болуы; мұрыннан, қызыл иектен, жатырдан, асқазаннан қан кету белгілері; ине енгізу орындарында қанталау (гематомалар) белгілерінің байқалуымен сипатталады.
Конго-Қырым геморрагиялық қызбасы қалай жұғады?
Негізгі жұқтырушы және ауру қоздырғыштарын тасымалдаушы кене болып табылады. Адамның ауруды жұқтыруы жұқпаланған кенемен қатынаста немесе кене шаққан жағдайларда, Конго-Қырым геморрагиялық қызбасы ауруымен ауырып жатқан науқас адамға күтім жасау кезінде науқастың қаны және ағза бөлінділері, сұйықтықтары арқылы және КҚГҚ қоздырғышымен залалданған медициналық құралдармен жанама байланыс арқылы жұғуы мүмкін.
Конго-Қырым геморрагиялық қызбасы ауруының алдын-алу:

  • табиғи ошақ аумағында орналасқан елді мекендердегі жануарларды, қора-жайлар мен үй жайларының аумағын кенеге қарсы залалсыздандыру;
  • табиғи ошақтарда орналасқан тұрғындар малдарды күтіп қарағанда, қырқым кезінде кенелердің шабуылынан сақтану және кене қанымен жанасты болдырмау мақсатында жеке қорғану үшін арнайы киім кию қажет (қалпақты комбинезон, шалбардың балағын шұлықтың ішіне салу, жақсы қорғалған аяқ және бас киім, резіңке қолғап);
  • табиғатқа демалысқа шыққанда кененің жабысқаны көрінетін ашық түсті, жақсы қорғалған, резеңкелі манжетті жеңі ұзын көйлек кию қажет. Денеге кененің жабысқанын тексеру үшін өзіңізге байқалмайтын орындарды (мойын, бастың шаш бөлігі, дененің артқы жағы, т.б.), бір-біріңіздің үстеріңізді мұқият қарап отыру қажет. Дененің ашық жерлеріне және киімге кенелердің шабуылынан қорғайтын немесе оны өлтіретін арнайы сақтану құралдарын қолдану қажет;
  • кене шаққанда немесе кенемен жанаста болу арқылы аса қауіпті инфекцияны жұқтыру мүмкін болғандықтан, өзіңізді және өз жанұяңызды қорғау үшін міндетті түрде жеке басты қорғау, сақтану құралдарын пайдаланыңыз!
    Кене шаққан немесе кенемен жанаста болған жағдайларда міндетті түрде медициналық ұйымға қаралуыңыз және 14 күн медициналық бақылауда болуыңыз қажет !!!!

«


Добавить комментарий

Ваш e-mail не будет опубликован. Обязательные поля помечены *