Алдағы 5-сәуірден бастап мопедтерді тіркеуге қатысты және иесінен жүргізушілік құқығын талап ететін заң күшіне енеді. Бұл туралы Шымкент қаласы әкімінің ресми өкілі, қала әкімінің орынбасары Сәрсен Құранбек энергетика және инфрақұрылым мәселелерін талқылауға арналған брифингінде баяндады.
Шымкенттің көшелерінен жүйіткіп жүрген мопед көп. Жүргізушілер арасында кәмелетке толмаған жастар, жол ережесін бұзатындар баршылық.
–Мопед жүргізушілердің тарапынан 2025 жыл басынан бері 263 әкімшілік құқық бұзушылық анықталған. Енді мопедтердің, электрлі самокаттардың шағын механикалық көлік құралына теңестірілуіне қатысты бұл талап күшейеді. Бұл жол жүру қауіпсіздігін арттыру үшін қажет дүние. Мопед жүргізетін тұлғаның «А-1» санатты басқару құқығы болуы керек. Екіншіден, осы мопедтер тіркелуі қажет, – деді қала әкімінің орынбасары.