Көктем мезгілі қауіпті дерттен сақ болыңыз!
Конго – Қырым геморрагиялық қызбасы (КҚГҚ) – бұл вирус қоздырғышынан туындайтын аса қауіпті жұқпалы ауру, науқас дер кезінде медициналық көмекке жүгінбеген жағдайда, өлім жағдайына әкеліп соқтыруы мүмкін.
КҚГҚ ауруының инкубациялық кезеңі ауру қоздырғышын жұқтырғаннан – аурудың алғашқы белгілерінің пайда болуына дейінгі мерзім 1-14 күнге дейінгі аралық, бұл кезеңнің ұзақтығы вирусты жұқтыру жолына байланысты болады.
Аурудың алғашқы белгілері: дене қызуының кенеттен 39-40’c дейін көтерілуімен, қатты бас ауыруымен, көздің қызаруы, бет- мойын және дененің жоғарғы бөлігінің қан кернеуімен, лоқсу немесе құсу, іш ауыруы немесе өтуі, ал ауру одан әрі дамыған жағдайда денеде бөртпелердің пайда болуы, мұрыннан, қызыл иектен, жатырдан, асқазаннан қан кету белгілері, ине енгізу орындарында қанталау (гематомалар) белгілерінің байқалуымен сипатталады.
Негізгі жұқтырушы және ауру қоздырғыштарын тасмалдаушы кене, сонымен қатар жабайы және үй жануарларының ағзасында да ауру қоздырғыштары болады. Адамның ауруды жұқтыруы кене шаққан жағдайларда және қанында вирусы бар жануарларды сою кезінде, сондай-ақ науқас адамға күтім жасау кезінде немесе мәйіттің қанымен, сұйықтығымен және ағза бөлінділерімен, ластанған медициналық құралдар арқылы жанама байланыс арқылы жұғуы мүмкін.
КҚГҚ ауруының алдын алу:
- аурудың алдын алу үшін табиғи ошақ аумағында орналасқан елді мекендердегі жануарларды, қора-жайлар мен үй жайларының аумағын кенеге қарсы залалсыздандыру;
- табиғи ошақтарда орналасқан тұрғындар малдарды күтіп қарағанда және қырқым кезінде кенелердің шабуылынан және кене қанымен жанасты болдырмау мақсатында жеке қорғану үшін арнайы киім кию қажет (қалпақты комбинезон, шалбардың балағын шұлықтың ішіне салу, жақсы қорғалған аяқ және бас киім, резіңке колғап);
- табиғатқа демалысқа шыққанда кененің жабысқаны көрінетін ашық түсті жақсы қорғалған резеңкелі манжетті жеңі ұзын көйлек кию қажет. Денеге кененің жабысқанын тексеру үшін өзіңіз және өзіңізге байқалмайтын орындарды (мойын, бастың шаш бөлігі, дененің артқы жағы т.б.) бір – біріңіздің үстеріңізді мұқият қарап отыру қажет. Дененің ашық жерлеріне және киімге кенелердің шабуылынан қорғайтын немесе оны өлтіретін арнайы сақтану құралдарын қолдану қажет.
Кене шаққан жағдайда аса қауіпті инфекцияны жұқтыру мүмкін болғандықтан, өзіңізді және өз жанұяңызды қорғау үшін міндетті түрде жеке басты қорғау, сақтану құралдарын пайдаланыңыз!
Кене шаққан немесе кенемен жанаста болған жағдайларда міндетті түрде медициналық ұйымға қаралуыңыз және 14 күн медициналық бақылауда болуыңыз қажет.
Үстіңізден кене тапқан жағдайда не істеу керек? Кенені алып тастаудың қауіпсіз әдістемесін естен шығармаңыздар:
-кенені жалаңаш қолмен ұстамаңыздар, өйткені жұқпалы ауру агенті шырышты қабықтар немесе терідегі зақымданған жерлер арқылы енуі мүмкін. Осындай сақтық әсіресе кенелерді үй жануарларынан алып тастайтын адамдар үшін қажет. Ұшы өткір пинцетті пайдаланыңыз немесе саусақтарыңызды резеңке қолғаптармен немесе қолғап болмаса, матамен қорғаңыздар. Кәдімгі пинцетпен оны теріге мүмкіндігінше жақындата отырып, онымен кенені іліп алу қажет. Пинцетті қатты қыспай (кенені мыжып тастамау үшін) шайқалтпай, ақырын және жұлқыламай абайлап тарту керек, өйткені бұндай жағдай кененің ауыз бөлігінің бөлініп теріде қалып қоюы мүмкін. Егер олай болса, ауыз бөлігін пинцетпен іліп, тартып шығару керек;
-кенені тартып алғаннан кейін шаққан жерді спиртпен, йодпен сүртіңіз және қолыңызды сабындап жуыңыз;
— кененің денесін мыжғылап бұзбаңыз, өйткені ішінде және сұйықтығында патогендер болуы мүмкін;
-алынған кенені ыдысқа салып, қақпақпен тығыздап жабу қажет, зертханалық зерделеуге жіберу үшін.
Кенеге ацетон, керосин, май және басқа да сұйық құюға, сондай – ақ оны теріден бөлу үшін кенені ысытуға мүлдем болмайды.
Сіздің міндетіңіз – оның өзі түсіп қалуын күтпей, кенені мүмкіндігінше тез алып тастау.
Ауру жұқтыру қаупін азайту үшін уақыттың маңызы зор екендігін ұмытпауымыз қажет.
Сіздің денсаулығыңыз өз қолыңызда екенін есте сақтау маңызды!
Шымкент қаласы Тұран ауданының
санитариялық-эпидемиологиялық
бақылау басқарма басшысы М.С.Бейсенбаев
