Шымкент қаласынан кәсіпкерлік нысандарын ашу, бизнес жобаларға инвестор болу ісіне қызығушылық танытушы шетелдіктер көп-ақ. Соның бірі жуырда Польшадан ат терлетіп келді. Атап айтқанда, Шымкент қаласының әкімі Ғабит Сыздықбеков «Fabe Polska» поляк компаниясының басшылығын қабылдап, арнайы келіссөздер жүргізді.
Инвестор Шымкентте аумағы 150 гектарды құрайтын жоғары технологиялы жылыжай салуды көздейді. Бұл туралы меморандумға да қол қойылды. Ауқымды жобаның жалпы құны 120 миллион АҚШ долларын құрайды. Инвестициялық жобаны жүзеге асыру нәтижесінде жылына 36 мың тонна қызанақ пен қияр өндіріп, 800-ден астам жаңа жұмыс орнын ашу жоспарланып отыр екен. Өндірілген өнім жергілікті нарыққа және шетелге экспортталады. Қала әкімі инвесторларға мұндай жобаны жүзеге асыруға қызығушылық танытқаны үшін алғыс айтты. «Инвестициялық климатты қолайлы ету – қаланың дамуының маңызды бағыттарының бірі. Біз мұндай жобаларға әрқашан жан жақты қолдау көрсетуге дайынбыз. Себебі, бұл қаланың ғана емес, тұтас елдің дамуына оң ықпал етеді», – деді Ғ.Әбдімәжитұлы.
Аталған жобаның іске қосылуы тек қаланың азық-түлік қауіпсіздігін қамтамасыз етуге үлес қосып қана қоймай, жылыжай бизнесінің дамуына, жаңа технологияларды енгізуге және жаңа жұмыс орындарын ашуға қосымша серпін беретінін атап өткен жөн.
