Шымкенттегі Алпамыс батыр ескерткіші бұрынғы орнынан көшірілді. Бірден айту керек, бұл жұмыстар демеушілер есебінен жүргізілген. Шымкент қалалық Мәдениет басқармасының баспасөз қызметі таратқан ақпаратқа сенер болсақ, Алпамыс батыр ескеркішінің орнын ауыстыру жөніндегі ұсыныс Шымкент қаласының Ардагерлер кеңесі тарапынан түскен.
Ескерткіштерге қатысты заңнама талаптарына сәйкес ҚР Мәдениет және ақпарат министрлігі жанынан құрылған арнайы комиссия ұсынысты қарап, ескерткіштің орнын ауыстыруға ресми келісімін берген.
«Ауыстырылуы жоспарланған ескерткішті орналастыру бойынша ситуациялық эскиздік жобасы дайындалып, белгіленген орындардың меншік иесі мен координациясы анықталды. Бүгінгі таңда аталған ескерткіштің орнын ауыстыру жұмыстары демеушілер тарапынан жүргізіліп жатыр. Ескерткіш Шымкент-Ташкент автожолының бойындағы кілт сәулеттік эскизінің жанына орнатылады», — делінген басқарма таратқан ақпаратта. Ескерткішті жаңа орынға орнату жұмыстары жаңа жылға дейін толық аяқталады.
Сурет Мақсат Шағырбайдікі
