Шымкентте Халыққа қызмет көрсету орталығына (ЦОН) ең көп баратын кімдер екені анықталды. «Азаматтарға арналған үкімет» мемлекеттік корпорациясының Шымкент қаласы бойынша филиалы жариялаған гендерлік статистика бойынша Халыққа қызмет көрсету орталықтарына (ХҚКО) жүгінушілер арасында ең көбі ер азаматтар екен. Жыл басынан бері ХҚКО-ларда жалпы 752 мың мемлекеттік қызмет көрсетілген болса, соның ішіндегі 207 мың қызметті әйелдер алған, бұл жалпы көрсеткіштің 27,5 пайызын құрайды. Ал қызмет алушылардың қалған 72,5 пайызы ер адамдардың үлесінде.
Ер адамдар жүгінетін негізгі қызмет түрлері:
1. Жылжымайтын мүлікті тіркеу – 49 288 өтініш.
2. Жер кадастры саласы бойынша қызметтер – 23 867 өтініш.
3. Құжаттандыру саласы бойынша қызметтер – 108 029 өтініш. Бұл көрсеткіштер ер адамдардың жылжымайтын мүлік, жер кадастры және құжаттандыру салаларында белсенді екенін көрсетеді.
Дегенмен, әйелдердің де белсенділігін жоққа шығаруға болмайды. Әйелдер жиі пайдаланатын қызметтердің бірі – электронды цифрлық қолтаңба (ЭЦҚ) алу. Атап айтқанда, 2024 жылдың 11 айында ХҚКО-лар арқылы 49 220 электронды цифрлық қолтаңба берілген. Оның 25 635-ін немесе 52 пайызын әйелдер алған. Сонымен қатар, әйелдер әлеуметтік саладағы қызметтерге жиі жүгінеді. Мәселен, бір жарым жасқа дейінгі бала күтімі бойынша жәрдемақы – 10 мыңға жуық анаға тағайындалған. Ал, көп балалы отбасыларға жәрдемақыны 53 мың отбасы алған. «Алтын алқа» және «Күміс алқа» иегерлеріне төленетін жәрдемақы – 13 мыңнан астам анаға тағайындалған.
Естеріңізге сала кетейік, Шымкент қаласы көп балалы отбасылар саны бойынша Қазақстанда көшбасшылардың бірі. Бұл көрсеткіш өңірдегі әлеуметтік жағдайды айқын көрсетеді. Бұл мәліметтер халыққа қызмет көрсету саласындағы гендерлік ерекшеліктерді көрсетіп қана қоймай, мемлекеттік қызметтердің қолжетімділігін арттыру жолында маңызды рөл атқарады.
