Шымкенттегі «Түркістан» сарайында Мұғалімдер күніне арналған мерекелік іс-шара өтті. Салтанатты жиында қала әкімі білім саласының үздік қызметкерлерін құттықтап, алғыс хаттармен марапаттады.
Мегаполис басшысы өз сөзінде педагог ең алдымен беделді маман, қызметі жоғары және жауапты миссия екеніне тоқталды.
– Ұстаздар еліміздің жарқын болашағы мен мемлекеттің дамуы жолында тынымсыз еңбек етуде. ҚР Президенті Қасым-Жомарт Тоқаевтың бастамасымен мұғалімдердің мәртебесін, олардың біліктілігін арттыруға және әлеуметтік жағдайын жақсартуға бағытталған көптеген шаралар қабылдануда – деді Ғабит Сыздықбеков.
Қала әкімі білім беру жүйесін дамытуға және өскелең ұрпақты тәрбиелеуге өлшеусіз үлес қосқан мұғалімдерге, сондай-ақ саланың ардагерлеріне алғысын білдірді. Бүгінгі таңда Шымкент қаласының білім беру мекемелерінде 30 мыңға жуық мұғалім жұмыс істейді, 500 мыңға жуық оқушы, студент оқиды. Жыл сайын заманауи мектептер саны артып келеді.
