Ауыс-түйіс
Мемлекет басшысы Қасым-Жомарт Тоқаевтың Жарлығымен Ғабит
Әбдімажитұлы Сыздықбеков Шымкент қаласының әкімі лауазымына тағайындалды. Жаңа
әкімді шымкенттіктерге ҚР Премьер-Министрі Әлихан Смайылов таныстырды. Үкімет
басшысы алдымен қалалық мәслихат депутаттарының жиналысына қатысып, қала әкімі
лауазымына Рашид Мыңбаев пен Ғабит Сыздықбековтің кандидатураларын таныстырды. Ә.
Смайылов Мемлекет басшысының шымкенттік мәлихат депутаттарына арнаған хатын
оқыды. Ашық дауыс беру нәтижесінде 10 депутат Р. Мыңбаевқа дауыс берсе, 19
депутат Ғ. Сыздықбековтің кандидатурасын қолдаған. Дауыс беру жиынына барлығы
29 депутат қатысты.
Осылайша депутаттардың басым даусын жинаған Ғабит Сыздықбеков Шымкент қаласының әкімі болып тағайындалды.
Ол 1980 жылы Шымкент қаласында дүниеге келген. Қазақ мемлекеттік заң университетін, РФ СІМ Дипломатиялық академиясын бітірген. Еңбек жолын 2004 жылы ҚР СІМ Мемлекеттік протокол қызметінің атташесі қызметінен бастаған.
2005-2006 жылдары – ҚР СІМ Мемлекеттік протокол қызметінің үшінші хатшысы, ҚР СІМ Еуропа және Америка департаментінің үшінші хатшысы,
2006-2007 жылдары – ҚР СІМ Кеңсесі баспасөз қызметінің үшінші хатшысы, екінші хатшысы қызметтерін атқарған.
2007-2011 жылдары – ҚР Парламенті Сенатының аппаратында түрлі лауазымдарды, 2011-2012 жылдары – ҚР СІМ Азия және Африка департаментінің басқарма басшысы, 2012-2017 жылдары – Франция Республикасындағы Қазақстан Республикасы Елшілігінің кеңесшісі, 2017 жылғы тамызда ҚР СІМ Әкімшілік және бақылау департаментінің кеңесшісі,
2017-2019 жылдары – ҚР Парламенті Сенаты төрағасының кеңесшісі болды. ҚР Парламенті Сенаты Аппаратының Халықаралық қатынастар, қорғаныс және қауіпсіздік комитетімен өзара іс-қимыл бөлімінің меңгерушісі,
2019 жылғы мамырдан бастап қыркүйекке дейін – ҚР СІМ Ерекше тапсырмалар жөніндегі елшісі, 2021 жылғы шілдеде ҚР Премьер-Министрі Кеңсесі басшысының бірінші орынбасары қызметтерін атқарды.
