| Д |
үниежүзілік гепатитке қарсы күрес күнінің 28 шілдеде атап өтілуінің өзіндік тарихы бар. Дәл осы күні В гепатиті вирусын ашқан Нобель сыйлығының лауреаты, америкалық ғалым Барух Бламберг дүниеге келген. Медицинада гепатит ауруын көбінесе «үнсіз жау» деп атайды. Вирустық гепатит бауырдың қабынуын тудырады және адам ағзасына ұзақ уақыт бойы ешқандай белгі бермей дамуы мүмкін. Статистикаға сүйенсек, дүние жүзінде бұл дертпен өмір сүріп жатқан адамдардың басым бөлігі инфекцияны жұқтырғанын тіпті білмейді. Осы орайда, жыл сайын 28 шілдеде атап өтілетін бұл атаулы күн әлем жұртшылығының назарын осы жаһандық мәселеге аударуға шақырады.
Гепатиттің бірнеше түрі бар, олардың ішінде ең көп таралғаны – А, В және С вирустары. А гепатиті көбінесе лас су мен тағам арқылы берілетін «кір қол ауруы» ретінде белгілі. В және С гепатиттері қан арқылы (стерильденбеген медициналық құралдар, ортақ инелер) және қорғалмаған жыныстық жол арқылы жұғады. Бұл індеттің алдын алмау салдары цирроз немесе бауыр обыры сияқты қайтымсыз процестерге әкелуі мүмкін.
Гепатитке қарсы күресте ең маңызды қару – сауаттылық пен алдын алу шаралары. В гепатитіне қарсы вакцинация — індеттен қорғанудың ең сенімді әдісі. Сонымен қатар, жеке гигиенаны сақтау, медициналық манипуляциялар кезінде тазалыққа мән беру және уақтылы тексеруден өту адам өмірін құтқарады.
Қазіргі медицинаның жетістіктері вирустық гепатиттерді, әсіресе С гепатитін толығымен емдеп жазуға мүмкіндік береді. Дегенмен, емнің нәтижелі болуы үшін ауруды ерте кезеңде анықтау маңызды. Дүниежүзілік гепатитке қарсы күрес күні – тек ауру туралы еске алу ғана емес, өз денсаулығымызға бей-жай қарамай, оған жауапкершілікпен қарауға шақыратын ұран. Бауырды қорғау – ұзақ әрі салауатты өмірдің кепілі.
Ғалия Абдуллаева,
Жетісай көпбейінді аудандық
орталық ауруханасының
салауатты өмір салтын
қалыптастыру мейірбикесі
